मनोरन्जन

उद्योगपति चौधरीको आत्मवृत्तान्तको समीक्षा

चितवन, १९ चैत । उद्योगपति विनोद चौधरीले पेसाप्रति निष्ठा र आफूप्रतिको इमान्दारिता कायम गर्न सके सफल बन्न सकिने बताउनुभएको छ ।

उहाँले लेख्नुभएको आत्मवृत्तान्त ‘विनोद चौधरी’को उद्योग वाणिज्य सङ्घ चितवनले बिहीबार नारायणगढमा आयोजना गरेको समीक्षा कार्यक्रममा उहाँले सफल हुन सपना देख्नुपर्ने बताउनुभयो । केही साहित्यकार, केही व्यवसायी र धेरै उद्योगपतिको बीचमा उहाँले पुस्तकको भन्दा आफ्नो जीवनमा भएको सफलता र अनुसरण गर्नुपर्ने विषयमा बोल्नुभएको थियो ।

सामुदायिक विद्यालयमा अध्ययन गरेर सामान्य परिवारबाट हुर्किएको आफ्नो प्रसङ्गलाई प्रस्ट्याउँदै उहाँले सपना देखेकै कारण सफल भएको बताउनुभयो । चौधरीले भन्नुभयो, “भाग्य र अरूलाई दोष नदिनुहोस्, निरन्तर एउटै सपना देख्नुहोस्, समय लामो लिन सक्छ, तर सफलता मिल्छ ।” २० वर्षभन्दा कान्छो उमेरमा विश्वका धेरै व्यक्ति प्रविधिका कारण फड्को मार्न सफल भएको भन्दै उहाँले सूचना प्रविधि, हवाई यातायात र क्रेडिट कार्डले विश्वलाई सानो बनाएको बताउनुभयो ।

आफ्नो पुस्तक लेखनका सम्बन्धमा सुरुमा लेख्ने वा नलेख्ने निर्णय गर्न समय लागेको बताउँदै उहाँले सबैखाले चुनौती मोलेर अन्ततोगत्वा पुस्तक लेख्ने निष्कर्षमा आफू पुगेको बताउनुभयो । पाँच वर्षको मिहिनेतपछि आत्मवृत्तान्त तयार भएको पनि उहाँले बताउनुभयो । आत्मवृत्तान्तमा आफ्ना कमीकमजोरीसमेत समावेश भएको उहाँले बताउनुभयो । कार्यक्रममा वरिष्ठ चलचित्रकर्मी नीर शाहले आफ्नो जीवनपछिको अध्ययन विनोद चौधरीको गरेको बताउँदै सामुदायिक पाठशालाको अध्ययनबाट यो अवस्थामा आउनु उदाहरणीय काम भएको बताउनुभयो ।

चौधरीले सामुदायिक विद्यालयमा पढ्दा पाठ्यक्रम मात्रै होइन मानिसको जीवन पढ्ने अवसर मिलेकै कारण उहाँमा सफलता मिलेको शाहले बताउनुभयो । चौधरी उद्योगपति मात्रै नभएर लेखक, कलाकार, साहित्यकार र सङ्गीतकार पनि रहेको शाहले बताउनुभयो ।

पुस्तकमाथि समीक्षा गर्दै प्राध्यापक एलवी क्षेत्रीले आफ्नो कमीकमजोरीसहित समावेश हुने आत्मवृत्तान्त लेख्नु ठूला व्यापारीका लागि आफँैमा चुनौतीपूर्ण भएपनि चौधरीको आत्मवृत्तान्त नेपाली उद्योगी, व्यवसायी र युवाका लागि पाठ भएको बताउनुभो ।

Post Comment

This site uses Akismet to reduce spam. Learn how your comment data is processed.