भर्खरै

अब नेपाल छिट्टै हिन्दूराष्ट्र हुन्छ पशुपति शमशेरको उद्घोष

download (4)

काठमाडौं, साउन १३ । राष्ट्रिय प्रजातन्त्र पार्टीका अध्यक्ष पशुपति शमशेर राणाले राप्रपा नेपालले हिन्दू–गणतन्त्रलाई स्विकारेकाले पार्टी एकता हुने निश्चित भएको बताएका छन् । बिहीबार राजधानीमा आयोजित साक्षात्कारमा बोल्दै अध्यक्ष राणालेभने, ‘राप्रपा नेपालसँगको पार्टी एकता हुन्छ, हिन्दू–गणतन्त्रलाई मुख्य एजेण्डा मानेर जाने सहमति भएको छ, बाँकी मुद्दा महाधिवेशनपछि टुँगो लगाउँछौं ।’

उनले आगामी चैत्रमा महाधिवेशन हुने र महाधिवेशनबाटै संघीयताको बारेमा सहमति गर्ने जनाए । उनले थपे, ‘संघीयता र गणतन्त्रलाई राप्रपाले स्वीकारिसकेको छ, पार्टी एकता हुँदापनि यसकै सेरोफेरोमा टेकेर समझदारी बनाएर अघि बढ्छौं ।’ राणाले दुई पार्टीवीचको एकता नेपाललाई हिन्दू–गणतन्त्र बनाउनका लागि भएको दाबी गरे । उनले भने, ‘अब नेपाल छिट्टै हिन्दूराष्ट्र हुन्छ ।’ साक्षात्कारमा उनले भने,‘पार्टी एकतापछि कस्तो नीति लिनेबारे अहिले छलफल भैरहेको छ, कतिपय असहमतिका बुँदाहरुमा हामी महाधिवेशनबाट टुँगोमा पुुग्छौं ।’ उनले अब हुने पार्टी एकता कहिल्यै नफुट्नेगरि हुने एकता हुने समेत दाबी गरे । पार्टी एकतापछि चुनाव चिन्ह समेत हलो हुने उनको विश्वास थियो । उनले राप्रपा नेपालले आगामी आईतबार पार्टी एकता गर्ने भनिरहेपनि पार्टी एकताको मिति तय भैनसकेको दाबी गरे । उनले पार्टी एकतापछि आफू राष्ट्रिय अध्यक्ष बन्ने र कमल थापालाई अध्यक्ष बनाउने र पार्टीभित्रका अन्य पदाधिकारी चयन गर्नेवारे सहमति भएको बताए । अध्यक्ष राणाले काँग्रेस–माओवादी केन्द्रवीच बनेको नयाँ गठबन्धनलाई आफ्नो पार्टीले समर्थन गर्ने उल्लेख गर्दै सरकारमा सहभागी हुने वा नहुनेवारे अहिले छलफल भैरहेको स्पष्ट पारे । उनले थपे,‘सरकारमा जाने वा नजानेवारे अहिले छलफल जारी छ, सम्भवतः दुवै पार्टी छलफल गरेर हामी एउटै निश्कर्षमा पुग्छौं ।’ उनले माओवादी केन्द्रका अध्यक्ष प्रचण्डलाई मतदान गर्ने विषयमा दुवै पार्टी एक हुने विश्वास व्यक्त गरे । केपी शर्मा ओली नेतृत्वको सरकारले जनतालाई राहत महशुस हुने खालका कुनै ठोस काम नगरेको, मधेशको मुद्दालाई हल नगरेको, संविधान कार्यान्वयन धिमा गतिमा अघि बढेको र पछिल्लो समय संसदबाट आर्थिक विधेयक असफल भएकाले आफ्नो पार्टीले सरकारलाई दिएको समर्थन फिर्ता लिएको स्पष्ट पारे । उनले अघि थपे, ‘स्भाविक रुपमा अब ओलीजीको विरुद्धमा उभिएकाले अब बन्ने प्रचण्डको नेतृत्वको सरकारलाई समर्थन गर्छौं ।’