एनआरएन विशेष

‘भिजिट नेपाल २०२०’ को प्रचार अभियान एनआरएन मेरिल्याण्ड च्याप्टरबाट शुरु

अमेरिकामा बसोबास गर्ने गैर आवासीय नेपाली नागरिकहरूले भिजिट नेपाल २०२० को प्रचार अभियान मेरिल्याण्डबाट औपचारिक रुपमा शुरु गरेका छन् । प्रवासमा बस्ने नेपालीहरूले मातृभूमिसँग कुनै न कुनै तवरले जोडिन र गैर आवासीय नेपालीहरूको नेपालसँगको भावनात्मक संबन्धलाई मुलुकको बृहत्तर हितका लागि उपयोग गर्न विभिन्न जमर्को गर्दै अाएका उनीहरूले यसाे गरेका हुन् ।


पछिल्ला वर्षहरूमा विश्वका विभिन्न राष्ट्रहरूमा गैर आवासीय नेपाली संघ अन्तरगत संगठित भई उनीहरूले विभिन्न अभियान तथा कार्यक्रमहरू संचालन गर्दै आइरहेका छन् ।

यसै सिलसिलामा जुलाई २१, २०१९ का दिन आयोजित गैर आवासीय नेपाली संघ अमेरिका मेरिल्याण्ड च्याप्टरको एक कार्यक्रममा च्याप्टर अध्यक्ष डोलनाथ घिमिरेले नेपाली मूलका स्टेट डेलिगेट ह्यारी भण्डारी र महावाणिज्य दूत प्रेमराजा महतको हातबाट “आफू पनि नेपाल जाऔँ, अरुलाई पनि नेपाल पठाऔँ” भन्ने नारा सहितको ब्यानर संयुक्त रूपमा सार्वजनिक गराउँदै उक्त अभियानको विधिवत शुरुआत गरेका हुन् ।

च्याप्टरको प्रथम बैठकले संस्थाका उपाध्यक्ष राजु पराजुलीलाई भिजिट नेपाल २०२० अभियानको लागि संयोजक चयन गरेको छ ।

Post Comment

This site uses Akismet to reduce spam. Learn how your comment data is processed.