राजनीति

देउवा बिरुद्ध रामचन्द्र पछि प्रकाशमानको घरमा गोप्य बैठक

कांग्रेसका केन्द्रीय सदस्यहरूले मुलुकको राजनीति संकटपूर्ण अवस्थाबाट गुज्रिरहेका बेला सभापति शेरबहादुर देउवा अनिर्णयको बन्दी भएर बसेको आरोप लगाएका छन् ।

काठमाडौंको ठमेलस्थित चाक्सीबारीमा रहेको कांग्रेस नेता प्रकाशमान सिंहको निवासमा मंगलबार भएको गोप्य भेलामा सहभागी केन्द्रीय सदस्यहरूले सभापति देउवाले पार्टीलाई क्रियाशील बनाउन नसकेको भन्दै आलोचना गरेका हुन् । उनीहरूले यस्तो संकटपूर्ण अवस्थामा कांग्रेस अनिर्णयमा बस्नु दुःखद् रहेको भन्दै आक्रोश जनाएका थिए ।

संविधान कार्यान्वयन, तीन तहको निर्वाचन, पार्टीको पदाधिकारी, केन्द्रीय सदस्य तथा विभागलाई पूर्णता दिने लगायतमा पार्टी सुस्तता देखाएको भन्दै कांग्रेस नेताहरूले देउवाको आलोचना गरेका थिए ।

पार्टी केन्द्रीय समितिको बैठक तत्काल बोलाउन सभापति देउवासँग माग गरिएको केन्द्रीय सदस्य बलबहादुर केसीले जानकारी दिए । उनले भने, ‘कांग्रेसले मुलुकको राजनीतिलाई टुलुटुलु हेरेर बस्ने होइन । समग्र राजनीतिलाई नेतृत्व गरेर जानुपर्छ । त्यसका लागि कांग्रेसलाई क्रियाशील बनाउनु पर्छ । केन्द्रीय समितिको बैठक बोलाउनु पर्छ ।’

भेलाले सप्तरीमा भएको घटनाले मुलुकमा झन् राजनीतिक अस्थिरता कायाम गरेको भन्दै ठूलो दलको हिसाबले कांग्रेसले समन्वयकारी भूमिका खेल्नुपर्ने निष्कर्ष निकालेको केसीले बताए ।

भेलामा कांग्रेसका नेता दिलेन्द्रप्रसाद बडु, आनन्दप्रसाद ढुङ्गाना, मीनेन्द्र रिजाल, महेश आचार्य, नारायण खड्का, गोविन्द भट्टराई, गुरुराज घिमिरेलगायत १५–२० जना केन्द्रीय सदस्यहरूको सहभागिता रहेको थियो ।

Post Comment

This site uses Akismet to reduce spam. Learn how your comment data is processed.