समाज

नेपाल–कोरिया साहित्य–संस्कृति सम्मेलन हुने

nepal-koreaकाठमाडौँ, असोज ८ गते ।  नेपाली लेखक सङ्घ र दक्षिण कोरियाको युरेसिया कल्चर फोरमबीच साहित्यिक एवं सांस्कृतिक आदानप्रदान गर्न द्विपक्षीय सम्झौता भएको छ ।

शुक्रबार सङ्घका अध्यक्ष श्रवण मुकारुङ र फोरमका महासचिव दाइकी जुङले सम्झौतापत्रमा हस्ताक्षर गर्नुभयो । सम्झौतापत्रमा उल्लेख गरिएअनुसार आगामी माघ फागुनतिर काठमाडौँमा द्विदेशीय बृहत् साहित्यिक एवं सांस्कृतिक सम्मेलन आयोजना गरिने छ । सम्मेलनमा कोरियाबाट सांसद्, प्राज्ञ, कवि, लेखक, चित्रकार, संस्कृतिविद्, व्यवसायी गरी करिब दुई सय जना सहभागी हुने साहित्यकार शशि लुमुम्बुले जानकारी दिनुभयो ।

तीनदिने सो सम्मेलनमा नेपाली तथा कोरियाली साहित्य, संस्कृति, दर्शन, इतिहास, कला तथा पर्यटनबारे दश कार्यपत्र प्रस्तुत गरिने तथा नेपाल र कोरियाका चुनिएका विशिष्ट कविले कविता प्रस्तुत गर्नुहुनेछ । सङ्घका अध्यक्ष मुकारुङका अनुसार सम्मेलनमा दुवै देशका सय चित्रकारका कलाकृति प्रदर्शन गरिनाका साथै लोकसंस्कृतिको प्रस्तुति रहनेछ ।

सो अवसरमा नेपाल र कोरियाका चुनिएका साठी कविका एक सय बीस कविता, सात सात कथा तथा पाँच पाँच उपन्यासको अनुवाद पनि प्रकाशन गरिने छ । सङ्कलनमा नेपालतर्फका बिपी कोइराला, पारिजातदेखि अहिलेको पुस्ताका प्रतिनिधि स्रष्टासम्मलाई समेटिने छ । सम्झौतानुसार आगामी असार साउनतिर सो सम्मेलनको दोस्रो संस्करण कोरियामा आयोजना गरिने छ ।

Post Comment

This site uses Akismet to reduce spam. Learn how your comment data is processed.