पर्यटन भर्खरै

सगरमाथाको आकाशयात्राका रोमाञ्चकारी दृश्यले…

-सिबी अधिकारी

सिन्धुपाल्चोक बाह्रबिसेकी ८८ वर्षीया गङ्गामाया पौडेललाई जीवनमै पहिलो पटक जहाज चढेर हिमालको दृश्यावलोकन गर्दा औधि रमाइन् । उनको खुशीको सीमा रहेन । जहाजको पहिलो यात्रा यसमा पनि मनमोहक हिमाली दृश्यावलोकन । उहाँकम्ति फुरुङ्ग पर्नुभएन । उनले आफ्नो जहाज यात्रा जीवनकै अविष्मरणीय क्षण भएको अनुभव सुनाइन् ।

‘जहाजबाट हिमाललाई नजिकै देख्न पाउँदा मलाई असाध्यै खुशी लागेको छ, खुशीको बयान गर्ने शब्द नै छैन,’ उनले भनिन् । आफ्नै आँगन, बारी, पाखा पखेराबाट देखेको उत्तरतर्फ टलक्क टल्किने हिमालको चुचुरो नजिकबाटै दृश्यात्मक साक्षात्कार गर्न पाउँदा उनलाई खुशीको सीमा नै थिएन । सगरमाथा क्षेत्र नजिकै पुग्दा जहाजले उचाई लिँदा र मोडिँदा हावाको बेगले जहाज निकै हल्लियो तर पनि गङ्गामायालाई कुनै डर लागेन ।

उनले अगाडि थपिन्, ‘जहाज हल्लिँदा डर लागेन, मलाई त मज्जा पो लागो, अहिले ज्वाइँले ल्याइदिनुभो । फेरि पनि अवसर मिल्यो भने चढिन्छ ।’ गङ्गामायासहित १६ जनाको समूह एकैपटक पर्वतीय उडानका लागि शुक्रबार सिन्धुपाल्चोकबाट गाडी चढेर काठमाडौँ आएको थियो ।

काठमाडौँकी ७० वर्षीया चन्द्रमाया पाठकलाई पनि पहिलो पटकको पर्वतीय उडान अविष्मरणीय रह्यो । ‘जहाज यात्रा त्यो पनि पर्वतको उडान जीवनकै अविष्मरणीय क्षण बन्यो,’ उनले भनिन् ।

गङ्गामाया र पाठक जस्तै ६० भन्दाबढी यात्रुले शनिबारको पर्वतीय उडानमा आनन्दमय अनुभूति बटुले । यो अवसर जुराइदिएको थियो यती एयरलाइन्सको पर्वतीय उडानले । सगरमाथाको आकाशयात्राका रोमाञ्चकारी दृश्यले उनीहरुलाई मोहित तुल्यायो ।

टिकट एक खरिदमा अर्को सित्तैमा पाइने, जहाज चढेर हिमाल हेर्न पाइने भएपछि फुरुङ्ग मन लिएर आकाश यात्रामा नजाने कुरै भएन ।

त्रिभुवन अन्तरराष्ट्रिय विमानस्थलबाट बिहान ठीक ८ बजे उडेको एयरलाइन्सको एटिआर–७२ जहाजले लाङ्टाङ हुदैँ गौरीशङ्करको बाटो भएर सर्वोच्च शिखर सगरमाथा पुगी मकालु हिमाललाई फन्को लगाएर पुनःकाठमाडौँ विमानस्थलमा अवतरण गरेको थियो ।

पर्वतीय उडानको समय बिहान ७ बजेदेखि हुने भए पनि आज मौसम खराबीका कारण एक घण्टा ढिलोगरी उडान भएको थियो । करिब ४५ मिनेटको आकाश यात्रको मुख्य उद्देश्य सगरमाथासहितका हिमश्रृङ्खलाको नजिकबाट दृश्यावलोकन गर्नु ।

शनिबारको आकाशयात्रा काठमाडौँ विमानस्थललाई छोडेर जहाज गणेश हिमालतिर मोडियो । जहाजका क्याप्टेन लभिस चन्दले जहाजको दिशा र गतिबारे यात्रुलाई जानकारी गराए ।

विमान परिचारिका (एयरहोस्टेज) विनिता केसी र शशि तिवारीलाई हिमालका बारेमा यात्रुलाई जानकारी गराउन भ्याइनभ्याइ थियो ।

दोलखाका दीपक ओलीले जहाज यात्रा त थुप्रै गर्नुभएको रहेछ तर पर्वतीय उडान भने पहिलो नै रे । सानी छोरीका साथ पर्वतीय उडानमा निस्किएका ओलीले आफ्नो देशको सुन्दरताको नजिकबाट अवलोकन गर्न पाउँदा असाध्यै खुशी मिलेको बताए ।

अध्ययनको शिलशिलामा डेनमार्क बसोबास गर्ने शिशिर भण्डारी दिदीको बिहेका सन्दर्भमा केही समयअघि काठमाडौँ आएका थिए । आन्तरिक पर्यटकलाई लक्षित गर्दै एयरलाइन्सले अफरसहित पर्वतीय उडान सञ्चालन गरेको थाहा पाएपछि पर्वतीय उडानको मज्जा लिएर मात्रै विदेश फर्कने निधो गरे र शनिबारको पर्वतीय उडानको अनुमति लिए ।

सिरहा बस्ने भिनाजु डा. राजदेव यादवको साथमा पर्वतीय उडानमा गएका भण्डारीले भने, ‘जहाज त धेरै चढियो आफ्नै देशको पर्वतीय उडानको अनुभव लिन पाएको थिइन, अहिले एयरलाइन्सको सस्तो अफर रहेकाले पनि उडानमा आएको हुँ देशको प्राकृतिक सुन्दरताको बयान गरी साध्य छैन ।’

लाङ्टाङ रेञ्जबाट जहाज अगाडि बढ्दै गर्दा झन सेता हिमालको नजिकतिर पुगियो । बाक्लो बादल तथा हिमपातका कारण सगरमाथा राम्रोसँग खुलेको थिएन । सगरमाथाको आधा भाग मात्र देखियो । अरु हिमाल छर्लङ्ग थिए । जहाज गोसाइथान चुचुरो नजिक हुँदै दोर्जेलाक्पा, गौरी–शङ्कर हिमाल स्पष्ट देखियो ।

क्रमशः नुम्बर, चोयु, पुमोरी हुँदै सगरमाथा हिमाल नजिक पुगेर ल्होत्से अमादब्लम हुँदै मकालु हिमालसम्म पुगेर जहाज पुनःकाठमाडौँ फर्किएको थियो ।

सगरमाथाको उचाई बढेसँगै आज पहिलो पर्वतीय उडान पनि हो । सरकारले आफ्नै स्रोत साधन र जनशक्तिबाट पहिलो पटक सगरमाथाको उचाई मापन गरी यही मङ्सिर २३ गते सगरमाथाको नयाँ उचाई आठ हजार ८४८.८६ मिटर भएको घोषणा गरेको थियो ।

नेपाल सरकार र चीन सरकारले संयुक्त रुपमा सगरमाथाको उचाई सार्वजनिक गरेका हुन् ।बन्दाबन्दीको करिब आठ महिनापछि गत मङ्सिर २० गतेदेखि नियमित पर्वतीय उडान शुरुआत भएको थियो ।

कोभिड–१९ सङ्क्रमणका कारण पर्वतीय उडान बन्द थियो । महामारीका कारण विदेशी पर्यटक नभए पनि आन्तरिक पर्यटकलाई लक्षित गर्दै निजी क्षेत्रका ठूला वायुसेवा कम्पनी बुद्ध एयर र यती एयरलाइन्सले पर्वतीय उडान शुरु गरेका थिए ।

यतीको आज सिमराको एकसहित चार उडान थियो । तर मौसमले साथ नदिएपछि काठमाडौँबाट मात्र एक उडान भयो । यतीले पहिलोपटक सिमराबाट पनि पर्वतीय उडान शुरु गरेको हो । सिमराको उडानमा २५ यात्रु सहभागी थिए । यात्रुको माग बढेमा पर्वतीय उडानको सङ्ख्या थपिने कम्पनीले उल्लेख गरेको छ ।

यसअघि यतीले क्षेत्रीय रुपमा विराटनगरबाट पर्वतीय उडान शुरु गरेको थियो । सन् २००२ देखि पर्वतीय उडान शुरु गरेको यतीले कोभिडभन्दा अघि दैनिक १० वटासम्म उडान सञ्चालन गरेको थियो ।

कोभिड महामारीकैबीच अहिले १० महिनापछि कम्पनीले उडान गरेको हो । यती एयरलाइन्सका प्रवक्ता सुदर्शन बर्तौलाले शुरुआती पर्वतीय उडान उत्साहवद्र्धक रहेको र यात्रुको मागबमोजिम उडान सङ्ख्या पनि क्रमशः थपिँदै जाने बताए ।

‘आजदेखि सिमराबाट पनि पर्वतीय उडान शुरु गरेको छ । त्यहाँका व्यवसायीको मागबमोजिम उडान गरेका हौँ । पर्वतीय उडानमा यात्रुको उत्साहवद्र्धक माग बढेको छ । शुरुमा हामीले हप्ताको एक मात्र उडान गर्ने योजना थियो । यात्रुको माग बढेपछि उडान सङ्ख्या थप्ने योजनामा छौँ,’ उनले भने ।

बुद्ध एयरको आज चार वटा उडान थियो तर प्रतिकूल मौसमले आजका सम्पूर्ण पर्वतीय उडान रद्द गरिएको कम्पनीले जनाएको छ । उनीहरुलाई पुनःअर्को उडानमा व्यवस्थापन गर्ने र भाडा फिर्ता लिएमा पनि सहजीकरण गरिने जनाइएको छ ।

यती र बुद्धले हरेक शनिबार पर्वतीय उडान गर्दै आएका छन् । यात्रुको माग बढेमा दैनिक उडान गर्ने उनीहरुको योजना छ । बुद्धले पर्वतीय उडानका लागि रु आठ हजार ९०० भाडादर तोकेको छ । यतीले रु आठ हजार ८४८ र १३ हजार २७५ भाडादर कायम गरेको छ । यी दुवै कम्पनीको पर्वतीय उडानमा एक टिकट खरिदमा अर्को टिकट सित्तैमा पाउने अफरले यात्रु बढेको एयरलाइन्सले जनाएका छन् ।

Post Comment

This site uses Akismet to reduce spam. Learn how your comment data is processed.